ఇక సెలవేనా?

చెప్పకుండా వెళ్తున్నాననే నీ మాట నిజం చేసుకుని వెళ్ళిపోయావు నల్లమల బాట
తిరిగిరాని లోకాలలోనా రచ్చబండ నిర్వహణ? ఏనాటికీ పూర్తికాదుగా నీ విచారణ?
మరణము లోనూ సృష్టించావు సంచలనం ఒక్కరోజు వెనక్కి వెళ్ళిపోతే బాగుండును కాలగమనం
రాజశేఖరా రారమ్మని పిలిచింది కదూ ఆ స్వర్గం ? ఇకసెలవేనా?

ప్లాస్టిక్ అక్షింతలు

చుక్కలు కానే కావవి కంది పెసరపప్పులు
చక్కగ చూస్తూ గడిపెయ్ కొనాలంటే తిప్పలు
పేదవాడు వెతకాలిక ఎంగిలాకు కుప్పలు
సామాన్యుడి బతుకంతా పప్పులకై అప్పులు

తారలు కోసుకురమ్మని కోరదులె ప్రేయసి
కూరలు పప్పులు కూడా కొనలేవని తెలిసి
ఆకాశం అందుతున్న సరుకుల ధరలను చూసి
చందమామను కూడా చూడలేము దడిసి

పప్పన్నం లేకుండా చెయ్యి పెళ్లి తంతులు

బియ్యం గింజలు బదులుగా "ప్లాస్టిక్ అక్షింతలు"

మహిళా దీనోత్సవం

నరకాసురవధ సత్యభామవిజయం మహిళా దినోత్సవం.
ద్రౌపది శపథం నెరవేర్చుకున్నదిఆత్మగౌరవ దినోత్సవం.
రుద్రమదేవి మహాదేవరాజుతో కనకాభిషేకం చేయించుకున్నరోజు మహిళా విజయోత్సవం.
సగం ముఖం తెగిపడినావీర విహారం చేసింది ఝాన్సీరాణి నారీ ధైర్యోత్సవం.
అంతరిక్షానికి అలవోకగా వెళ్లారు కల్పనా సునీతలు- సబలాదినోత్సవం.
కానీ ----అత్యాచారాల వార్తలులేకుండా ఒక్కరోజు గడిచినా అది నిజంగా "మహిళా దినోత్సవం"
"మానవతా దినోత్సవం"
లేదంటే........
కాదా అది మహిళా దీనోత్సవం!!

ఇలా ఉందాం.

ఎప్పుడు చూసినా ఉరుకుల పరుగుల జీవనయానం
కల్సి ఒకేచోట కని తిని విని అని ఎన్నినాల్లయింది ?మనం
ఉన్నది నలుగురమే కాని కల్సుకోనీయని కాలాన్ని ఏమనిఅందాం
ఒక్కసారైనా రోజులో ఒకచోట కూర్చుని మాట్లాడుకుందాం !
రుచులు ఆస్వాదిస్తూ అమ్మకి, అభిరుచులు చర్చిస్తూ నాన్నకీ
దగ్గరగా గడుపుదాం
దినమంతా కలిగిన భావాల్ని అనుభవాల్నీ పంచుకుందాం
టి వి చూడని సమయం ఎంతబాగుందో అనుకుందాం!
ప్రతిరోజూ కొత్తగా మొదలెడదాం .
ఏమంటారు? ఇలాఉందాం!

అభినందనం

ఎందరో బ్లాగు బ్రహ్మలు
అందరూ ఆనందోబ్రహ్మలు !
వచ్చేసిన అందరికీ, వచ్చేసే మరెందరికో
అభినందన మందారాలు...

ముందు మాట

చెప్పాలనుకునే చిన్నమాట
ఎప్పటినుంచో మనసులో వున్నమాట
నొప్పించకుండా చెప్పాలన్నదే నా బాట
ఇప్పుడిప్పుడే వచ్చి నిల్చున్నా ఈ చోట.......